កត្តា ៥យ៉ាង ដែលត្រូវពិចារណាមុននឹង យល់ព្រមទទួលយកការងារមួយ

ចូរអ្នកពិនិត្យមើលទៅលើគន្លឹះខ្លះៗខាងក្រោមនេះ ដែលអាចជួយណែនាំថា តើអ្នកគួរតែទទួល យកការងារថ្មីដែរឬទេ?

1. ពេលវេលា និង ការធ្វើដំណើរ
   ចំពោះមនុស្សម្នាក់ៗ ពេលវេលាគឺមានសារៈសំខាន់ណាស់។ ដូចនេះ មុនពេលអ្នកព្រមទទួលយកការងារណាមួយ អ្នកគួរតែពិចារណាអោយបានច្បាស់ថា តើអ្នកមានពេលទំនេរ គ្រប់គ្រាន់អាចធ្វើការនោះបានដែរឬទេ? ស្របជាមួយគ្នានេះដែរ បើការងារនោះតម្រូវឲ្យអ្នកត្រូវធ្វើដំណើរតាមខេត្តជាប្រចា តើអ្នកអាចបំពេញតម្រូវការនោះដែរឬទេ?

1. ប្រាក់បៀរវត្តន៍
   ចំពោះការសម្រេចចិត្តទទួលយកការងារថ្មី ប្រាក់ខែគឺមិនមែនសុទ្ធតែសំខាន់ទេ សម្រាប់បេក្ខជនម្នាក់ៗ ប៉ុន្តែប្រសិនបើ បេក្ខជននោះកំពុងតែជួបប្រទះកង្វះខាតប្រាក់ ចំណាយ នោះកត្តាប្រាក់ខែនេះ គឺពិតជាសំខាន់ខ្លាំងណាស់។
   ហេតុដូចនេះ ចំពោះបេក្ខជនណាដែលយល់ថា អ្នកព្រមទទួលយកការងារថ្មីនោះ ដោយសារតែប្រាក់ខែ ជាដំបូងអ្នកគួរតែពិនិត្យលើចំណុចខាងក្រោមនេះជាមុនសិន៖
   1. តើប្រាក់ដែលផ្តល់ឲ្យត្រូវនឹងអ្វីដែលអ្នករំពឹងដែរទេ?
   2. តើប្រាក់បៀវត្តន៍នោះត្រូវនឹងសមត្ថភាពឬជំនាញរបស់អ្នកដែរឬទេ?
   3. តើអ្នកអាចទទួលយកប្រាក់បៀវត្តន៍ដោយមិនមានអារម្មណ៍ថាត្រូវគេបង្ខំទេ?
   4. តើអ្នកពិតជាអាចផ្តគ់ផ្គង់លើការចំណាយប្រចាំថ្ងៃ ជាមួយនឹងប្រាក់ខែ នោះពិតមែនទេ?

ប្រសិនបើចំលើយរបស់អ្នកបង្ហាញថាអ្នកមិនពេញចិត្តជាមួយនឹងសំនួរណាមួយខាងលើនេះ នោះអ្នកគួរតែបដិសេធការងារនោះភា្លមទៅ។

1. សារៈប្រយោជន៍
   ប្រសិនបើអ្នកមិនច្បាស់អំពីអត្ថប្រយោជន៍ ដែលអ្នកអាចទទួលបានពីការងារថ្មី នោះ ចូរអ្នកសាកសួរពត៌មានបន្ថែមតាមរយៈអ្នកសម្ភាសន៍ ដើម្បីធ្វើការបកស្រាយឲ្យ អ្នកអាចយល់ដឹងបានច្បាស់ជាងនេះ។
   អត្ថប្រយោជន៍របស់ការងារនីមួយៗអាចបួករួមជាមួយនឹង ធានារ៉ាប់រងសុខភាព នឹង អាយុជីវិត ពាក្យសុំច្បាប់ការងារ រយៈពេលដែលអាចសំរាកបាន និង អត្ថប្រយោជន៍ ផ្សេងៗទៀត។ ក្នុងពេលនេះ អ្នកគួរតែដឹងថា តើអ្នកអាចទទួលបានតម្លៃនៃអត្ថ ប្រយោជន៍ប៉ុណ្ណាដែរ ប្រសិនបើអ្នកយល់ព្រមទទួលយកការងារថ្មីនេះ?

1. ស្ថានភាពបុគ្គល
   ចំពោះអ្នកជាបេក្ខជនម្នាក់ នៅពេលដែលអ្នកទទួលបាន ការណែនាំឲ្យទទួលយកការងារថ្មី អ្នកអាចគិតថា ការងារនោះគឺត្រូវនឹងអ្វីដែលអ្នកចង់ បាន ក៏ប៉ុន្តែ ចំពោះអ្នកដទៃ គឺមិនយល់ដូច្នេះឡើយ។ ប្រសិនបើអ្នកកំពុងតែស្ថិតក្នុងកាលៈទេសៈ ដែលអ្នកកំពុងតែ ត្រូវការការងារធ្វើជាបន្ទាន់ អ្នកគួរតែយល់ព្រមទៅលើការស្នើរបស់អ្នកសម្ភាសន៍ ក្នុងការទទួលយកការងារថ្មីទៅ ពីព្រោះនេះជាឧិកាសល្អសម្រាប់អ្នកដើម្បីដោះស្រាយ ជីវភាពជាបណ្តោះអាសន្ន បើទោះបីជាការងារនោះមិនមែនជាជម្រើសទីមួយរបស់អ្នក ក៏ដោយ។ ប៉ុន្តែ ក្នុងករណីខ្លះដែលអារម្មណ៍របស់អ្នកប្រាប់អ្នកថាអ្នកមិនគួរទទួលយកការងារថ្មីនោះឡើយ អ្នកនៅតែមានភាពទាក់ទើ ក្នុងការទទួលយកឪកាសថ្មីនោះ អ្នកគួរតែបដិសេធភ្លាមៗទៅ។

1. បរិស្ថាននៅក្នុងក្រុមហ៊ុន
   បរិស្ថាននិងវប្បធម៌របស់ក្រុមហ៊ុនក៏អាចជាកត្តាសំខាន់មួយ ក្នុងការទទួលយក ការងារថ្មីដែរ។ បុគ្គលិកក្រុមហ៊ុនប្រាកដជាអាចប្រតិបត្តិការងារបានល្អ ប្រសិនបើ បរិស្ថានរបស់ក្រុមហ៊ុនមានផាសុកភាព របៀបរៀបរយ និង សណ្តាប់ធ្នាប់ល្អ។

ប្រសិនបើអ្នកយល់ឃើញថា អ្នកពិតជាមិនអាចទទួលយកបរិស្ថាន និង ចុះសម្រុងជាមួយនឹងវប្បធម៌របស់ក្រុមហ៊ុនថ្មីទេ អ្នកអាចធ្វើការសម្រេចចិត្តបដិសេធការងារថ្មីនោះបាន។